لیژنه هاوبه‌شه‌كانی قائیمقامیه‌تی سلێمانی به‌رده‌وامن له سه‌ردان و چاودێری كردنه‌كانیان به مه‌به‌ستی دڵنیابوونه‌وه له جۆری خواردن و پێداویستیه‌كان و به‌رزنه‌كردنه‌وه‌ی نرخی كاڵا و شتومه‌ك، سه‌رۆكی لیژنه هاوبه‌شه‌كانیش ده‌ڵێت زۆربه‌ی فرۆشیاران پابه‌ندن به جێبه‌جێكردنی مه‌رج و ڕێنماییه‌كانه‌وه.
ڕۆژی هه‌ینی 2/6/2017 له هه‌ڵمه‌تێكی به‌رفراونیاندا له ناو بازاری شاری سلێمانی لیژنه هاوبه‌شه‌كان به دواداچونیان بۆ جێبه‌جێكردنی مه‌رج و ڕێنماییه‌كان كرد و زۆربه‌ی فرۆشیاران پابه‌ندن و ئه‌و كاسبكارانه‌ش كه پابه‌ندنه‌بوون ڕووبه‌ڕووی سزای یاسایی كرانه‌وه.
گۆران قادر سه‌رۆكی لیژنه هاوبه‌شه‌كانی قائیمقامه‌یتی سلێمانی ڕایگه‌یاند له مانگی ره‌مه‌زاندا سه‌ردان و پشكنینه‌كانیان زیاتر كردووه و بۆ دڵنیابوونه‌وه له جێبه‌جێكردنی مه‌رج و ڕێنماییه‌كان به به‌رده‌وامی لیژنه‌كان سه‌ردانی بازار و ماركێت و فرۆشتگاكان ده‌كه‌ن، له دوایین سه‌ردانیاندا له ناوبازاری سلێمانی زیاتر له 100 شوێنی جیاوازیان به‌سه‌ر كردووه‌ته‌وه و ئه‌وه‌ی تێبینی ده‌كرێت زۆربه‌ی كاسبكاران پابه‌ندن به جێبه‌جێكردنی مه‌رج و ڕێنماییه‌كانه‌وه و زۆربه‌یان نرخیان له‌سه‌ر كاڵاكان داناوه كه ئه‌مه‌ش ئه‌وه نیشان ده‌دات به دواداچوونی لیژنه‌كان ئه‌نجامی باشیان هه‌بووه.
سه‌رۆكی لیژنه هاوبه‌شه‌كانی قائیمقامیه‌تی سلێمانی ده‌شڵێت به‌رده‌وام ده‌بن له سه‌ردان و پشكنینه‌كانیان و له هه‌ر شوێنێك كه‌م و كورتی هه‌بێت لێپرسینه‌وه ده‌كرێت.
