ڕێژه‌ی هاورده‌كردنی به‌روبوومی سه‌وزه و میوه له پارێزگای سلێمانی بۆ مانگی حوزه‌یران دیاری ده‌كرێت و به‌ڕه‌چاوگرتنی پێگه‌یشتنی به‌روبوومی ناوخۆیی له‌م وه‌زه‌دا هاورده‌كردنی به‌روبوومی ده‌ره‌كی ڕێك ده‌خرێت.
رؤژی دووشه‌ممه 29/5/2017 ئاوات محمد قائیمقامی سلێمانی له گه‌ڵ لیژنه‌ی چاودێری كردنی به‌روبوومی سه‌وزه و میوه له پارێزگای سلێمانی كۆبووه‌وه و پاش هه‌ڵسه‌نگاندن بۆ ئاستی به‌روبومی ناوخۆیی له‌م وه‌رزه‌دا ڕێژه‌ی هاورده‌كردنی به‌روبوومی ناوخۆیی بۆ مانگی 6 دیاری كرا ، بۆ دروستكردنی هاوسه‌نگیش له نێوانی به‌رهه‌می هاورده‌كراو و به‌روبومی ناوخۆیدا بڕیاردرا به ڕه‌چاوكردنی پێگه‌یشتنی به‌روبومی ناوخۆیی سه‌وزه و میوه له‌م وه‌رزه‌دا باجی زیاتر له‌سه‌ر هه‌موو ئه‌و سه‌وزه و میوانه دابنرێت كه له‌م وه‌رزه‌دا له ناوخۆی هه‌رێمی كوردستان پێده‌گات، ئه‌و به‌روبوومانه‌ش كه هێشتا له ناوخۆی هه‌رێم پێنه‌گه‌یشتوون به هه‌مان شێوه‌ی ڕابردوو ڕێگه به هاورده‌كردنیان بدرێت.
به پێ ی ئه‌و هه‌ڵسه‌نگاندنه‌ی كه لیژنه‌كه كردوویه‌تی له‌م وه‌رزه‌دا پارێزگای سلێمانی مانگانه پێویستی به (650_700) تۆن سه‌وزه و (300) تۆن میوه و (600_700) تۆن قارچك ده‌بێت و چاوه‌ڕێش ده‌كرێت له مانگی 6 به هۆی پێگه‌یشتنی به‌روبوومی ناوخۆیی 35% ئه‌و پێداویستیانه پڕبكرێته‌وه و له چه‌ند مانگی داهاتووشدا به هۆی پێگه‌یشتنی هه‌موو جۆره‌كانی سه‌وزه و میوه به‌روبوومی ناوخۆیی ڕیژه‌ی 80% بۆ 90% پێداویستی بازار پڕبكاته‌وه ، بۆ ساخكردنه‌وه‌ی به‌روبوومی جوتیاران بڕیاردرا بایه‌خی زیاتر به به‌روبوومی ناوخۆیی بدرێت و به پێ ی پێگه‌یشتنی وه‌رزی به‌روبوومه ناوخۆییه‌كان ڕێگه به هاورده‌كردنی به‌روبوومی ده‌ره‌كی بدرێت.
