.JPG)
پارێزگار و قائیمقامی سلێمانی و لیژنەی سوتەمەنی ئەنجومەنی پارێزگا كۆبوونەوەو چەند بریارێك لەسەر پرسی سوتەمەنی لە پارێزگای سلێمانی درا.
كۆبوونەوەكە ئەمرۆ 8ی شوبات لە دیوانی پارێزگای سلێمانی بەسەرپەرەشتی سەردار قادر ل.پارێزگاری سلێمانی بەرێوەچوو، تیدا گرفتەكانی سوتەمەنی لە پارێزگای سلێمانی تاوتوێ كرا و تەئكید كرایەوە كە هەموو هەوڵێك بدرێت تا بەزووترین كات نەوتی سپی بۆ هاووڵاتیان دابین بكرێت.
لەو رووەوە كۆبوونەوە پێداگری لەسەر ئەوكرد كە "كۆمپانیاكانی هاوردەكاری سوتەمەنی ناچار بكرێن كە نەوتی سپیش هاوردە بكەن تا بتوانرێت لایەنی كەم نرخی نەوتی سپی دابەزین بە خۆیەوە ببینێ"
لە بەشێكی تری كۆبوونەوەكەدا مۆڵەتی بەنزینخانەكان و كارگەكانی غازو پاڵاوتگەكان خرایە بەرباس و لەو رووەوە لەكۆبوونەوەكەدا بڕیاردرا "پێداچوونەوە بە مۆڵەتی بەنزینخانەو كارگەكانی غازی شل پاڵاوتگە و ڕیسایكلینەكاندا بكرێت بۆ ماوەیەك پێدانی مۆڵەت ڕابگیرێت تا ڕێنمای نوێ دەردەكرێت"
هەروەك تەئكید كرایەوە كە لەڕووی كوالێتیەوە هەوڵەكان زیاتر بكرێن و سزاكانیش بەرامبەر ئەو شوێنانەی كە سوتەمەنی كوالێتی خراپ بە هاووڵاتیان دەفرۆشن قورستر بكرێن.
لە كۆبوونەوەكەدا پێشنیار كرا ئەو سوتەمەنیەی كە لەوێستگەكاندا دەستی بەسەردا دەگیرێت بەهۆی خراپی كوالێتیەوە بگەڕێندرێتەوە بۆ ئەو كۆمپانیایەی كە سوتەمەنیەكەی لێوەهاتووە.
سەبارەت بەو ئۆتۆمبێلانەی كە غازی شل بە شێوەی تەنكەر دەگوازنەوەو دابەشی دەكەن قائیمقامی ناوەندی سلێمانی ڕاسپێردرا كە لەڕێگەی لیژنە پەیوەندیدارەكانەوە چاودێری وردی ئەو كەس و كۆمپانیایانە بكەن و ئەو لایەنانەشی مۆڵەتیان نییە كار ئاسانیان بۆ بكەن بە پێی یاساو ڕێنماییەكان مۆڵەتیان پێبدرێت.
