ئەحمەد عەلی ئەحمەد، جێگری پارێزگاری سلێمانی بۆ کاروباری هونەری و سەرۆکی لیژنەی باڵای سەرپەرشتی و بەدواداچوونی بەبازاڕکردنی گەنم لە پارێزگای سلێمانی و پارێزگای هەڵەبجە و ئیدارە سەربەخۆکانی گەرمیان و ڕاپەڕین، لە دیوانی پارێزگادا بە ئامادەبوونی ئەندامانی لیژنەکە، سەرپەرشتی کۆبوونەوەی ئامادەکاری و زەمینەسازی بۆ دەستپێکردنی پرۆسەی وەرگرتنی گەنمی جوتیاران، کرد.
لە کۆبوونەوەکەدا کێشە و گرفتەکانی بەردەم پرۆسەکە و شێواز و میکانیزمی چارەسەرکردنیان خرانەڕوو، پێشنیازو بڕیاری پێویستیان لەبارەوە درا.
بەپێی داتا و زانیاریەکانی بەڕێوەبەرێتی گشتی کشتوکاڵی پارێزگای سلێمانی، ڕووبەری (١١٩١٦٥٩) دۆنم لە سنوری هەر چوار یەکە کارگێڕیەکە (پارێزگای سلێمانی، پارێزگای هەڵەبجە، ئیدارەی سەربەخۆی گەرمیان و ڕاپەڕین) بە گەنم داچێنراوە، بەپێی پلانی وەزارەتی کشتوکاڵ و سەرچاوەکانی ئاوی حکومەتی هەرێمی کوردستان بۆ وەرگرتنەوەی گەنمی جوتیاران لە هەرێمی کوردستان بۆ ساڵی ٢٠٢٥، بڕی (١٥٩٤٧٣) تۆن گەنم لە جوتیارانی پارێزگاکانی سلێمانی و هەڵەبجە و ئیدارە سەربەخۆکانی گەرمیان و ڕاپەڕین وەردەگیرێت و لەم پرۆسەیەدا (٤٠٠٤٠) جوتیار، گەنم ڕادەستی سایلۆکان دەکەن.
