قائیمقامی سلێمانی و بەڕێوەبەری شوێنەواری سلێمانی و رێكخراوی گەشەپێدانی مەدەنییەت (CDO) یاداشتی نۆژەنكردنەوەی بارەگای شێخ مەحمود یەكەم مەلیكی كوردستانیان ئیمزا كرد.
دوای كۆبوونەوەیەك بە بەشداریی بەڕێوەبەری شوێنەواری سلێمانی و سەرۆكی رێكخراوی گەشەپێدانی مەدەنییەت و ژمارەیەك لە كەسایەتیی ‌و پارێزەرانی كەلەپوریی، لە كۆنگرەیەكی رۆژنامەوانیدا (ئاوات محەمەد) قائیمقامی سلێمانی رایگەیاند: بارەگای یەكەم مەلیكی كوردستان (شێخ مەحمودی نەمر) پێشتر لەلایەن حكومەتی هەرێمەوە پارەی بۆ تەرخان كرا، بەڵام بەهۆی كێشەی داراییەوە نۆژەنكردنەوەكە تەواو نەكرا، لە ئێستادا رێكخراوی گەشەپێدانی مەدەنییەت بە خەرجیی خۆیان قۆناغێكی تری نۆژەنكردنەوەكە دەست پێدەكەن و پرۆسەكە تەواو دەكرێت.
قائیمقامی سلێمانی وتیشی: هەر لەناو گەڕەكە كەلەپورییەكانی سلێمانیدا چەند خانوویەكی تریش لەلایەن خاوەنەكانیانەوە نۆژەن دەكرێنەوە، كە شایەنی دەستخۆشین.
ئاوات محەمەد راشیگەیاند، دەیانەوێت بە هاوكاریی هەموو لایەك سیمای كەلەپوریی سلێمانی بپارێزن و لەو رووەوە كاری باشیان كردووە، بەتایبەت كە رێگەیان لە دروستكردنی گەراج و دروستكردنی بینای بازرگانی گرتووە.
قائیمقامی سلێمانی تەئكیدی كردەوە، بەپێی یاسایەك كە لەلایەن پەرلەمانی كوردستانەوە دەرچووە، هەر كەس و لایەنێك دەستكاریی رەسەنایەتیی ئەو لایەنە شارستانییەی سلێمانی بكات، رێكاری یاسایی لە بەرامبەر دەگرنەبەر و ڕووبەڕووی دادگای دەكەنەوە.
دواتر یاداشتی نۆژەنكردنەوەی میوانخانە و بارەگای مەلیك مەحمود لەلایەن ئاوات محەمەد قائیمقامی سلێمانی و بەڕێوەبەری شوێنەواری سلێمانی و سەرۆكی رێكخراوی گەشەپێدانی مەدەنییەتەوە ئیمزا كرا و پرۆسەی نۆژەنكردنەوەكە بەمزوانە دەست پێدەكات.

بۆ زانیاریی زیاتر لە بارەی كار ‌و چالاكییەكانی پارێزگای سلێمانی، دەتوانن لە تۆڕە كۆمەڵایەتییەكان فۆڵۆمان بكەن ‌و نوێترین هەواڵ ‌و زانیاریتان بەدەست بگات، بەم ئەدرەسانەی خوارەوە:

https://twitter.com/SlemaniGov

https://www.linkedin.com/company/30141235/admin/

https://www.facebook.com/slemanigov/

https://www.instagram.com/slemani_governorate/

https://www.youtube.com/channel/UCYh48iQHYPrIJdftytgLeqg?view_as=subscribe