لەسەر ئەركی خێرخوازێك نەخۆشخانەیەكی نەخۆشییە گوازراوەكان لە دەربەندیخان دەكرێتەوە، پارێزگاری سلێمانیش پشتیوانیی خۆی بۆ كەرتی تەندروستی لە سنورەكەدا دووپات دەكاتەوە.
ڕۆژی سێشەممە 30/6/2020، لە قەزای دەربەندیخان د. هەڤاڵ ئەبوبەكر پارێزگاری سلێمانی، بە ئامادەبوونی بەڕێزان قائیمقامی قەزای دەربەندیخان و بەڕێوەبەری گشتیی تەندروستیی سلێمانی و بەڕێوەبەری تەندروستیی دەربەندیخان و بەڕێوەبەری فەرمانگە حكومییەكان و دەستەیەك لە نوێنەرانی خەڵكی بەڕێزی دەربەندیخان و ڕێكخراوە مەدەنییەكان، بەشدارییكرد لە كردنەوەی (نەخۆشخانەی بێشكان بۆ نەخۆشییە گوازراوەكان) لە دەربەندیخان، كە لەلایەن خێرخوازی بەڕێز (عوسمانی حاجی حەمەسەعید)ەوە لەسەر ئەركی تایبەتی خۆی و لەژێر چاودێریی قائیمقامیەتی قەزای دەربەندیخان و بەڕێوەبەرایەتیی تەندروستیی دەربەندیخاندا دروستكراوە.
نەخۆشخانەكە بە (٢٦) تەخت بۆ چارەسەر و چاودێریی كۆرۆنا و لە دواتردا وەك نەخۆشخانەیەكی فریاكەوتن سودی لێوەردەگیرێت، پارێزگاری سلێمانی سوپاسی بەڕێز عوسمانی حاجی حەمەسەعیدی كرد و هیوای خواست نمونەی ئەو مرۆڤە بەخشندە و مەردانە زۆربێت، پیرۆزبایی پارێزگای سلێمانیشی پێشكەش بە خەڵك و ئیدارەی دەربەندیخان كرد بۆ ئەو پڕۆژە گرنگە و پشتیوانی خۆی بۆ كەرتی تەندروستیی دووپاتكردەوە.
لە بەشێكی تری سەردانەكەیدا بەڕێز پارێزگار سوپاسی بەڕێز مامۆستا ناسیح مەلا حەسەن قائیمقامی قەزای دەربەندیخانی كرد، كە لە سبەینێوە كۆتایی بە كارەكانی دێت و دڵسۆزانە لەماوەی ڕابردوودا بە پشتیوانیی هەموان ئەركەكانی جێبەجێ كردووە.

بۆ زانیاریی زیاتر لە بارەی كار ‌و چالاكییەكانی پارێزگای سلێمانی، دەتوانن لە تۆڕە كۆمەڵایەتییەكان فۆڵۆمان بكەن ‌و نوێترین هەواڵ ‌و زانیاریتان بەدەست بگات، بەم ئەدرەسانەی خوارەوە:

https://twitter.com/SlemaniGov

https://www.linkedin.com/company/30141235/admin/

https://www.facebook.com/slemanigov/

https://www.instagram.com/slemani_governorate/

https://www.youtube.com/channel/UCYh48iQHYPrIJdftytgLeqg?view_as=subscriber