به‌مه‌به‌ستی بنبڕكردن و سه‌رهه‌ڵنه‌دانی دیارده‌ی سوتانی فیتپه‌مپ هاوشێوه‌ی ساڵی ڕابردوو، لیژنه‌ی سوته‌مه‌نی پارێزگای سلێمانی كۆبونه‌وه‌یه‌كیان سازكرد، له‌كۆبونه‌وه‌كه‌دا بڕیار له‌سه‌ر توندتركردنی ڕێكاره‌ یاساییه‌كاندرا.

ئه‌مڕۆ به‌ئاماده‌بونی د.ئاسۆ فه‌ره‌یدون پارێزگاری سلێمانی و جێگری پارێزگار‌و قائیمقام و به‌ڕێوه‌به‌ری به‌شی یاسایی‌و ئیداری پارێزگا‌و كوالێتی كۆنتڕۆڵ و به‌شێك له‌ئه‌ندامان، كۆبونه‌وه‌ی لیژنه‌ی سوته‌مه‌نی سازكرا، ئامانج له‌كۆبونه‌وه‌كه‌ ڕێگرتن و دوباره‌ نه‌بونه‌وه‌ی دیارده‌ی سوتانی فیتپه‌م بوو هاوشێوه‌ی ساڵی ڕابردوو، هاوكات توندتركردنی ڕێكاره‌ یاساییه‌كان له‌به‌رامبه‌ر ئه‌و به‌نزینخانانه‌ی كه‌ به‌نزینی خراپ ده‌فرۆشن.

له‌كۆبونه‌وه‌كه‌دا بڕیاری پێداچونه‌وه‌ به‌كاره‌كانی لیژنه‌ی سوته‌مه‌نی پارێزگای سلێمانی درا، هاوكات بڕیاردرا چاودێری به‌رده‌وامی سوته‌مه‌نی و ڕێكاره‌یاساییه‌كانی به‌رده‌م باشبونی كوالێتی به‌نزینبن.

ئه‌وه‌ش له‌كاتێكدایه‌، پێشتر به‌بڕیاری پارێزگای سلێمانی هه‌شت به‌نزینخانه‌ی سنوری پارێزگای سلێمانی به‌هۆی خراپی كوالێتی به‌نزینه‌وه‌ داخران، بڕیاره‌ ڕێكاره‌ یاساییه‌كان توندتر بكرێته‌وه‌ له‌به‌رامبه‌ر ئه‌و به‌نزینخانانه‌ی ده‌بنه‌ خۆی خراپی كوالێتی به‌نزین.