پارێزگاری سلێمانی پرسەنامەیەك بۆ كۆچی دوایی پرۆفیسۆر عیزەدین مستەفا رەسوڵ رادەگەیەنێت، دواتریش بەشداریی لە رێوڕەسمی بەخاكسپاردنەكەیدا كرد، ئەمەی خوارەوە دەقی پرسەنامەكەیە:
بەناوی خودای بەخشندەی میهرەبان
بەناوی پارێزگای سلێمانییەوە، پرسە و ماتەمینیی و خەم و پەژارەی خۆمان بۆ كۆچی دوایی زانا و پرۆفیسۆری ناوداری كورد بەڕێز د. عیزەدین مستەفا ڕەسوڵ، ڕادەگەیەنین.
ڕابردووی پرشنگدار و پڕشكۆ و گەوهەر و بەخششی ئاینیی و نیشتمانیی و زانستیی و ئەدەبیی و ئەكادیمیی و بیری پێشكەوتنخوازانە و خەمخۆرانەی بەڕێزیان و بنەماڵەكەیان ڕۆڵی جوامێرانە و شكۆمەندانەیان دەسەلمێنن.
بەڕێزیشیان شایستە و شایانی ئەوەن كە نازناوی ئینسكلۆپیدیای كوردیان لێبنرێت، كە تا دوا ساتەكانی تەمەنی پڕبەر‌هەمیان لە خوێندنەوە و نوسین و توێژینەوە و پڕۆژەكانیان نەوەستان و خەرمانێكی دەوڵەمەندیان پێشكەش بە مرۆڤایەتیی و بەناوەندە زانكۆیی و ئەكادیمیی و سیاسیی و ڕۆژنامەگەرییەكان كرد.
داواخوازین لە خوای گەورە؛ ئارامیی و ئۆقرەیی بە هەموومان ببەخشێت و پرۆفیسۆری ئازیزمان بكاتە خانەخوێی بەهەشتی نەبڕاوەی خۆی.
(انا لله وانا الیە راجعون)
د. هەڤاڵ ئەبوبەكر
پارێزگاری سلێمانی
٢٠١٩/١٠/٣
